പാൻ-ഇന്ത്യൻ ബ്ലോക്ക്ബസ്റ്റർ ഹിറ്റായ ഹനുമാന് ശേഷം പ്രശാന്ത് വർമ്മ ഒരുക്കുന്ന ‘ജയ് ഹനുമാൻ’ ചിത്രത്തിന്റെ തീം സോങ് പുറത്ത്. ദീപാവലി പ്രമാണിച്ചാണ് ചിത്രത്തിന്റെ തീം സോങ് റിലീസ് ചെയ്തത്. ഒരു മിനിട്ടിന് മുകളിൽ ദൈർഘ്യമുള്ള ഈ ഗാനം ആലപിച്ചിരിക്കുന്നത് രേവന്ത്, രചിച്ചിരിക്കുന്നത് കല്യാൺ ചക്രവർത്തി. ഓജസ് ആണ് ഗാനത്തിന് സംഗീതം പകർന്നിരിക്കുന്നത്. ദേശീയ അവാർഡ് ജേതാവായ കന്നഡ സൂപ്പർതാരം റിഷഭ് ഷെട്ടി നായകനായ ചിത്രത്തിന്റെ ഫസ്റ്റ് ലുക്ക് ഒക്ടോബർ 30 നു പുറത്ത് വിട്ടിരുന്നു. ഹനുമാൻ എന്ന ചിത്രത്തിന്റെ രണ്ടാം ഭാഗമായ ജയ് ഹനുമാൻ നിർമ്മിക്കുന്നത് തെലുങ്കിലെ വമ്പൻ നിർമാണ കമ്പനിയായ മൈത്രി മൂവി മേക്കേഴ്‌സ് ആണ്.
കൈയ്യിൽ ശ്രീരാമ ഭഗവാന്റെ വിഗ്രഹം ആദരവോടെ പിടിച്ച്, കാലിൽ ഇരിക്കുന്ന ഹനുമാൻ എന്ന കഥാപാത്രമായി ആണ് കഴിഞ്ഞ ദിവസം റിലീസ് ചെയ്ത ഫസ്റ്റ് ലുക്ക് പോസ്റ്ററിൽ റിഷഭ് ഷെട്ടിയെ ചിത്രീകരിച്ചിരിക്കുന്നത്. ഈ ആകർഷകമായ പോസ്റ്റർ റിഷഭിന്റെ ബലിഷ്ഠമായ ശരീരത്തോടൊപ്പം ഹനുമാൻ്റെ അഗാധമായ ഭക്തിയും ശക്തിയും പ്രതിഫലിപ്പിക്കുകയും ചെയ്യുന്നു. ഈ ഐതിഹാസിക വ്യക്തിത്വത്തെ അദ്ദേഹം എങ്ങനെ സ്ക്രീനിൽ ജീവസുറ്റതാക്കുന്നു എന്നറിയാൻ ആരാധകർ ആകാംക്ഷയോടെ കാത്തിരിക്കുകയാണ്.
തകർക്കാനാവാത്ത ശക്തിയുടെയും വിശ്വസ്തതയുടെയും പ്രതീകമായ ഹനുമാന്റെ കഥ പറയുന്ന ചിത്രം വമ്പൻ ആക്ഷൻ ചിത്രമായാണ് പ്രശാന്ത് വർമ്മ ഒരുക്കാൻ പോകുന്നത്. പ്രശാന്ത് വർമ്മ സിനിമാറ്റിക് യൂണിവേഴ്സിന്റെ ഭാഗമാണ് ജയ് ഹനുമാൻ. നവീൻ യെർനേനിയും വൈ രവിശങ്കറും ചേർന്ന് നിർമ്മിക്കുന്ന ചിത്രം ഉയർന്ന ബജറ്റിലും മികച്ച സാങ്കേതിക നിലവാരത്തിലുമായിരിക്കും ഒരുക്കുന്നത്. ഐമാക്സ് ത്രീഡി ഫോര്മാറ്റിലാണ്‌ ജയ് ഹനുമാൻ ചിത്രീകരിക്കുന്നത്. പിആർഒ- ശബരി.
