ദുൽഖർ സൽമാൻ നായകനായ ലക്കി ഭാസ്കർ മൂന്നാം വാരത്തിലും ബ്ലോക്ക്ബസ്റ്റർ വിജയം തുടരുകയാണ്. കേരളത്തിൽ 20 കോടി ഗ്രോസ് നേടി മെഗാ ഹിറ്റായ ചിത്രം, ആഗോള തലത്തിൽ 100 കോടിയും കടന്നാണ് കുതിക്കുന്നത്. ദീപാവലി റിലീസായി തീയേറ്ററുകളിലെത്തിയ ചിത്രം മൂന്നാം വാരത്തിലും ബുക്കിംഗ് പ്ലാറ്റ്‌ഫോമുകളിൽ ട്രെൻഡിങ് ആണ്. റിലീസ് ചെയ്ത് മൂന്നാഴ്ച പിന്നിടുമ്പോഴും ചെന്നൈ, ഹൈദരാബാദ്, ബാംഗ്ലൂർ തുടങ്ങിയ തെന്നിന്ത്യൻ നഗരങ്ങളിലെല്ലാം ലക്കി ഭാസ്കറിന് ഗംഭീര ബുക്കിംഗ് ആണ് ലഭിക്കുന്നത്. പ്രേക്ഷകർ ഹൃദയം കൊണ്ട് സ്വീകരിച്ച ഈ പീരീഡ് ഡ്രാമ ത്രില്ലർ പാൻ ഇന്ത്യൻ വിജയമാണ് നേടിയത്.
ദുൽഖർ സൽമാന്റെ കരിയറിലെ തന്നെ ഏറ്റവും വലിയ ബോക്സ് ഓഫീസ് ഹിറ്റായി മാറിയ ചിത്രം നൂറ് കോടി ഗ്രോസ് കളക്ഷൻ നേടുന്ന ആദ്യ ദുൽഖർ ചിത്രവുമാണ്. 98 കോടി ആഗോള ഗ്രോസ് നേടിയ സീതാരാമത്തെയാണ് ലക്കി ഭാസ്കർ മറികടന്നത്. ഇതോടെ തെലുങ്കിൽ തുടർച്ചയായ മൂന്നു ബ്ലോക്ക്ബസ്റ്റർ സമ്മാനിക്കുന്ന ആദ്യ മലയാള താരമായും ദുൽഖർ സൽമാൻ മാറി. വെങ്കി അറ്റ്ലൂരി രചിച്ച് സംവിധാനം ചെയ്ത ചിത്രം, തെലുങ്ക്, മലയാളം, തമിഴ്, ഹിന്ദി ഭാഷകളിലാണ് റിലീസ് ചെയ്തത്. കേരളത്തിലും ഗൾഫിലും ചിത്രം വിതരണം ചെയ്തിരിക്കുന്നത് ദുൽഖർ സൽമാന്റെ വേഫെറർ ഫിലിംസാണ്.
മീനാക്ഷി ചൗധരി നായികാ വേഷം ചെയ്ത ഈ പീരീഡ് ഡ്രാമ ത്രില്ലറിന് സംഗീതമൊരുക്കിയത് ദേശീയ അവാർഡ് ജേതാവായ ജി വി പ്രകാശ് കുമാറും, കാമറ ചലിപ്പിച്ചത് മലയാളിയായ നിമിഷ് രവിയുമാണ്. 1992 ൽ ബോംബ സ്റ്റോക്ക് എക്സ്ചേഞ്ചിൽ നടന്ന കുപ്രസിദ്ധമായ തട്ടിപ്പിൻ്റെ പശ്‌ചാത്തലത്തിൽ കഥ പറയുന്ന ഈ ചിത്രം സൂര്യദേവര നാഗവംശി, സായി സൗജന്യ എന്നിവരുടെ നേതൃത്വത്തിലുള്ള സിതാര എന്റർടൈൻമെൻറ്സും ഫോർച്യൂൺ ഫോർ സിനിമാസും ചേർന്നാണ് നിർമ്മിച്ചത്. അവതരണം ശ്രീകര സ്റ്റുഡിയോസ്.
