ദുൽഖർ സൽമാൻ നായകനായ പാൻ ഇന്ത്യൻ തെലുങ്ക് ചിത്രം ലക്കി ഭാസ്കറിന്റെ ടിക്കറ്റ് ബുക്കിംഗ് ആരംഭിച്ചു. ഒക്ടോബർ 31 നു ദീപാവലിക്കാണ് ചിത്രം ആഗോള തലത്തിൽ റിലീസ് ചെയ്യുന്നത്. ബുക്കിംഗ് ആരംഭിച്ചു മണിക്കൂറുകൾക്ക് ഉള്ളിൽ തന്നെ ആന്ധ്ര, തമിഴ്നാട് സംസ്ഥാനങ്ങളിലും ദുബായിലും മികച്ച അഡ്വാൻസ് ബുക്കിംഗ് ആണ് ചിത്രത്തിന് ലഭിക്കുന്നത്. ആന്ധ്ര, തെലുങ്കാന സംസ്ഥാനങ്ങളിൽ ഒക്ടോബർ 30 വൈകുന്നേരം 6 മണി മുതൽ നൂറിലധികം പ്രീമിയർ ഷോകളാണ് ലക്കി ഭാസ്കറിന് വേണ്ടി ഒരുക്കിയിരിക്കുന്നത്. എന്നാൽ കേരളത്തിൽ മികച്ച ബുക്കിംഗ് ചിത്രത്തിന് ലഭിക്കുമോ എന്ന ആശങ്കയിലാണ് ആരാധകർ.
തെലുങ്ക് ചിത്രം ആയത് കൊണ്ടാണ് ഈ ചിത്രത്തിന് കേരളത്തിൽ വമ്പൻ ബുക്കിംഗ് ലഭിക്കുമോ എന്ന ആശങ്ക ആരാധകരിൽ ഉള്ളത്. ദുൽഖർ സൽമാന് വമ്പൻ ജനപ്രീതിയുള്ള ദുൽഖറിൻ്റെ സ്വന്തം തട്ടകമാണ് കേരളം. അദ്ദേഹത്തിൻ്റെ മുൻ റിലീസുകൾക്കൊക്കെ വമ്പൻ ബുക്കിങ്ങും ബോക്സ് ഓഫീസ് പ്രകടനവും കേരളത്തിൽ കാഴ്ച വെക്കാൻ സാധിച്ചിട്ടുണ്ട്. ആ പ്രകടനം ആവർത്തിക്കാൻ ലക്കി ഭാസ്കറിനും സാധിക്കുമോ, അതോ കേരളം ചിത്രത്തെ കൈവിടുമോ എന്നറിയാനുള്ള ആകാംക്ഷയിലാണ് ആരാധകരും സിനിമ പ്രേമികളും. വെങ്കി അറ്റ്ലൂരി രചിച്ച് സംവിധാനം ചെയ്ത ചിത്രം കേരളത്തിലും ഗൾഫിലും വമ്പൻ റിലീസായി വിതരണം ചെയ്യന്നത് ദുൽഖർ സൽമാന്റെ വേഫെറർ ഫിലിംസാണ്.
തെലുങ്ക്, മലയാളം, തമിഴ്, ഹിന്ദി ഭാഷകളിൽ റിലീസ് ചെയ്യുന്ന ചിത്രം സൂര്യദേവര നാഗവംശി, സായി സൗജന്യ എന്നിവരുടെ നേതൃത്വത്തിലുള്ള സിതാര എന്റർടൈൻമെൻറ്സും ഫോർച്യൂൺ ഫോർ സിനിമാസും ചേർന്നാണ് നിർമ്മിച്ചിരിക്കുന്നത്. അവതരിപ്പിക്കുന്നത് ശ്രീകര സ്റ്റുഡിയോസ്.
മീനാക്ഷി ചൗധരി നായികാ വേഷം ചെയ്ത ചിത്രത്തിന്റെ കൊച്ചി, ദുബായ് പ്രൊമോഷൻ ഇവൻ്റുകൾ വലിയ വിജയമായി മാറിയിരുന്നു. ഒരു സാധാരണക്കാരന്റെ ജീവിതത്തിലെ അസാധാരണമായ കഥ പറയുന്ന ഈ ചിത്രം ഒരു പീരീഡ് ഡ്രാമ ത്രില്ലറായാണ് ഒരുക്കിയിരിക്കുന്നത്. ഹൈപ്പർ ആദി, സൂര്യ ശ്രീനിവാസ് എന്നിവരാണ് ചിത്രത്തിലെ മറ്റു പ്രധാന താരങ്ങൾ.
