കഥാപാത്രങ്ങളിലും കഥപറച്ചിലിലും പുതുമ തേടുന്ന ആഷിഖ് അബുവിന്റെ ഫിലിമോഗ്രഫിയില് പുതിയ മാനങ്ങള് എഴുതിച്ചേര്ക്കുകയാണ് ക്രിസ്മസ് റിലീസായി എത്തിയ റൈഫിള് ക്ലബ്. ഡാഡി കൂളില് തുടങ്ങി, ദോശ ഉണ്ടാക്കിയ കഥയിലൂടെ നീങ്ങി, ബോഡി ഷെയ്മിങ്ങിന്റെ ക്രൂരതകള് തുറന്നുകാട്ടി, സ്ത്രീകള്ക്കെതിരെയുള്ള അക്രമങ്ങള്ക്ക് കടുത്ത വാക്കില് മറുപടി നല്കി, കെട്ടുപാടുകളില്ലാത്ത പ്രണയത്തെ രചിച്ച്, സൗഹൃദത്തിന്റെ നൊസ്റ്റാള്ജിയ ഉണര്ത്തി, കേരളത്തിന്റെ ആത്മാവിനെ തൊട്ട അതിജീവനം ത്രില്ലിങ്ങായി പറഞ്ഞ്, കാലാതീതമായ കലാസൃഷ്ടിക്ക് പുതുഭാഷ്യം ചമച്ച് അങ്ങനെ അങ്ങനെ ആഷിഖ് അബു മലയാളസിനിമയുടെ ഏറ്റവും മികച്ച ഫിലിം മേക്കറുകളിലൊരാളാണെന്ന് എത്രയോ തവണ തെളിയിച്ചു കഴിഞ്ഞു.
സ്വയം ആവര്ത്തിക്കാതിരിക്കാന് സര്ഗാത്മകമായ ഒരു കടുപ്പം കാത്തുസൂക്ഷിക്കുന്ന ആഷിഖ് അബുവിന്റെ ഏറ്റവും മികച്ച സിനിമകളിലൊന്നാണ് ഇപ്പോള് പുറത്തുവന്നിരിക്കുന്ന റൈഫിള് ക്ലബ്. ഇതൊരു സംവിധായകന്റെ സിനിമായാണെന്ന് വിജയരാഘവനും ദിലീഷ് പോത്തനുമെല്ലാം സിനിമയ്ക്ക് മുന്പേ ആവര്ത്തിച്ച് പറഞ്ഞതു എന്തുകൊണ്ടാണെന്ന് റൈഫിള് ക്ലബിനെ കുറിച്ച് കാണികള് പറയുന്ന വാക്കുകളില് വ്യക്തമാണ്. കഥയേക്കാള് അത് പറഞ്ഞിരിക്കുന്ന രീതിയും സ്റ്റെലിഷായ മേക്കിങ്ങും തരിമ്പും വലിച്ചുനീട്ടലില്ലാത്ത അവതരണശൈലിയും തന്നെയാണ് റൈഫിള് ക്ലബിനെ മനോഹരമാക്കുന്നത്.
നിറയെ കഥാപാത്രങ്ങളുള്ള ചിത്രത്തില് ഓരോരുത്തര്ക്കും കൃത്യമായ സ്ഥാനം നല്കാനും ആഷിഖ് അബുവിന് കഴിഞ്ഞിട്ടുണ്ട്. ഇട്ടിയാനമായി വാണി വിശ്വനാഥ്, ദിലീഷ് പോത്തന്റെ സെക്രട്ടറി അവറാന്, വിജയരാഘവന് അവതരിപ്പിക്കുന്ന കുഴിവേലി ലോനപ്പന്, സുരേഷ് കൃഷ്ണയുടെ ഡോ. ലാസര്, സുരഭി ലക്ഷ്മിയുടെ സൂസന്, വിഷ്ണു ആഗസ്ത്യയുടെ ഗോഡ്ജോ, ഉണ്ണിമായയുടെ സൂസന്, ദര്ശന രാജേന്ദ്രന്റെ കുഞ്ഞുമോള്, പൊന്നമ്മ ബാബു അവതരിപ്പിക്കുന്ന ശോശ എന്നിവരടങ്ങുന്ന റൈഫിള് ക്ലബ് അംഗങ്ങളും റൊമാന്റിക് സ്റ്റാര് ഷാജഹാനായുള്ള വിനീത് കുമാറും അനുരാഗ് കശ്യപും ഹനുമാന് കൈന്ഡും സെന്ന ഹെഗ്ഡെയും ഉള്പ്പെടുന്ന വില്ലന്മാരുടേയുമെല്ലാം കഥാപാത്രങ്ങള്ക്ക് രസികന് സ്ക്രീന് സ്പേസുണ്ടായിരുന്നു. കോമഡിയും ആക്ഷനും തമ്മിലുള്ള ഞാണിന്മേല് കളി കൂടിയാണ് ആഷിഖ് അബു ഗംഭീരമായി അവതരിപ്പിച്ചിരിക്കുന്നത്.
ആദ്യമായി ഛായാഗ്രഹണം നിര്വഹിക്കുന്ന ചിത്രത്തില് ഓരോ സീനും ഏറ്റവും ഭംഗിയായി തന്നെ അവതരിപ്പിക്കാനും ആഷിഖ് അബു എന്ന ക്യാമറ പേഴ്സണ് കഴിഞ്ഞിട്ടുണ്ട്. റൈഫിള് ക്ലബ് എന്ന പേരിനെ അന്വര്ത്ഥമാക്കുംവിധമുള്ള ചിത്രത്തിന്റെ ആക്ഷന് കൊറിയോഗ്രഫിയെയും സ്റ്റൈലിഷായി തന്നെയാണ് അദ്ദേഹം അവതരിപ്പിച്ചിരിക്കുന്നത്. നിര്മാതാവിന്റെ ഉത്തരവാദിത്തം കൂടി ആഷിഖിന് മേല് ഉണ്ടായിരുന്ന ചിത്രമായിരുന്നു റൈഫിള് ക്ലബ് എന്ന ആലോചിക്കുമ്പോഴാണ് ആഷിഖ് എന്ന ഫിലിം മേക്കറുടെ ആഴം കുറച്ചുകൂടി ബോധ്യമാവുക.
അതേസമയം, തികച്ചും ഒരു റെട്രോ സ്റ്റൈല് സിനിമയായി ആഷിഖ് അബു ഒരുക്കിയിരിക്കുന്ന റൈഫിള് ക്ലബിന് മികച്ച പ്രതികരണമാണ് പ്രേക്ഷകരില് നിന്നും ലഭിക്കുന്നത്. ബോളിവുഡില് ശ്രദ്ധേയ സിനിമകള് സംവിധാനം ചെയ്തിട്ടുള്ള, വേറിട്ട വേഷങ്ങളില് വിവിധ ഭാഷകളില് അഭിനയിച്ചിട്ടുള്ള അനുരാഗ് കശ്യപിന്റെ മലയാളത്തിലെ അരങ്ങേറ്റ ചിത്രം കൂടിയാണ് ‘റൈഫിള് ക്ലബ്’. ഒ.പി.എം സിനിമാസിന്റെ ബാനറില് ആഷിഖ് അബു, വിന്സന്റ് വടക്കന്, വിശാല് വിന്സന്റ് ടോണി എന്നിവര് ചേര്ന്നാണ് ചിത്രം നിര്മിച്ചിരിക്കുന്നത്. ശ്രീ ഗോകുലം മൂവീസ് ത്രു ഡ്രീം ബിഗ് ഫിലിംസാണ് വിതരണം.
റൈഫിള് ക്ലബ്ബിന്റെ തിരക്കഥയും സംഭാഷണവും ഒരുക്കിയിരിക്കുന്നത് ദിലീഷ് കരുണാകരന്, ശ്യാം പുഷ്കരന്, ഷറഫു, സുഹാസ് എന്നിവര് ചേര്ന്നാണ്. ‘മായാനദി’ക്ക് ശേഷം ആഷിക്ക് അബു, ശ്യാം പുഷ്കരന്, ദിലീഷ് നായര് ടീം ഒന്നിക്കുന്നു എന്ന പ്രത്യേകതയും ചിത്രത്തിനുണ്ട്. ‘മഞ്ഞുമ്മല് ബോയ്സി’ലൂടെ വലിയ ജനപ്രീതി നേടിയ അജയന് ചാലിശ്ശേരിയാണ് റൈഫിള് ക്ലബ്ബിന്റെ പ്രൊഡക്ഷന് ഡിസൈനര്. മേക്കപ്പ്: റോണക്സ് സേവ്യര്, വസ്ത്രാലങ്കാരം: മഷര് ഹംസ, എഡിറ്റര്: വി സാജന്, സ്റ്റണ്ട്: സുപ്രീം സുന്ദര്, സംഗീതം: റെക്സ് വിജയന്, പ്രൊഡക്ഷന് കണ്ട്രോളര്: കിഷോര് പുറക്കാട്ടിരി, സ്റ്റില്സ്: റോഷന്, അര്ജുന് കല്ലിങ്കല്, പി.ആര്.ഒ: ആതിര ദില്ജിത്ത്.
